હાયર એજ્યુકેશન માટે લોકો વિદેશમાં મેડિસિન, બિઝનેસ એડમિનિસ્ટ્રેશન, એન્જિનિયરિંગ વગેરે શીખવા જાય છે. પરંતુ જાદુવિદ્યાનો કોર્સ કરવા માટે વિદેશની યુનિવર્સિટી ઓફર કરે તો કેવું લાગે? યુકેની એક યુનિવર્સિટીમાં જાદુવિદ્યાનો અભ્યાસ શરૂ થયો છે અને આગામી સપ્ટેમ્બર મહિનાથી તેમાં એડમિશન શરૂ થશે. આ કોર્સમાં સ્ટુડન્ટને જાદુટોણા અને બીજી વિદ્યાઓ વિશે થિયરી અને પ્રેક્ટિકલ ભણાવવામાં આવશે. જે લોકોને ક્રિસ્ટલ જાેઈને ભવિષ્ય જાણવું હોય, ચહેરા જાેઈને આગાહી કરવી હોય અથવા ડાકણવિદ્યા સમજવી હોય તેઓ યુકેની એક્ઝેટર યુનિવર્સિટીમાં એડમિશન લઈ શકે છે.
આ યુનિવર્સિટી જાદુવિદ્યા શીખવીને તેની માસ્ટર્સ ડિગ્રી આપે છે. દુનિયાભરમાં સાયન્સ અને ટેક્નોલોજીમાં લોકોને જેમ રસ વધી રહ્યો છે તેમ તેમ મેજિકમાં પણ રસ વધતો જાય છે. આ કોર્સમાં વિશ્વભરમાં ડાકણવિદ્યા (વિચક્રાફ્ટ) અને મેજિકથી કેવા સામાજિક અને ઐતિહાસિક પરિવર્તનો આવ્યા તેનો અભ્યાસ કરવામાં આવશે. આ પ્રોગ્રામમાં વેસ્ટર્ન સાહિત્ય અને આર્ટમાં જાદુવિદ્યાનું સ્થાન, આર્કિયોલોજી થિયરી, મધ્ય યુગમાં મહિલાઓનું સ્થાન, ભ્રમણા અને જાદુટોણાનો ઉપયોગ તથા જાદુવિદ્યા પાછળની ફિલોસોફી ભણાવવામાં આવશે. યુનિવર્સિટીના મેજિક ડિપાર્ટમેન્ટના હેડ તરીકે જે પ્રોફેસર છે તેઓ મધ્યકાલિન અરેબિક સાહિત્યના જાણતાર છે. તેમણે કહ્યું કે લોકોને આજકાલ વિચક્રાફ્ટમાં ઘણો રસ પડે છે અને તેઓ વિધિવત રીતે જાદુ શીખવા માગે છે. તમામ એકેડેમિક ફિલ્ડની જેમ આ કળામાં પણ રિસર્ચ થયું છે. સામાન્ય રીતે લોકો એવું માને છે કે પશ્ચિમના લોકો માત્ર સાયન્સમાં માને છે અને ત્યાં જાદુટોણાને કોઈ સ્થાન નથી.
પરંતુ આ માસ્ટર્ડ ડિગ્રી કોર્સના કારણે આ ધારણા બદલાઈ જશે. યુકેમાં હવે લોકકથાઓ, ડાકણવિદ્યા, ટેરોટ કાર્ડ, ક્રિસ્ટલ રિડિંગમાં વધુ લોકોને રસ પડી રહ્યો છે. યુકેની યુનિવર્સિટી ઓફ એક્ઝેટર આ દિશામાં માસ્ટર્સ કોર્સ શરૂ કરીને આગળ નીકળી ગઈ છે. બીજી તરફ અન્ય યુનિવર્સિટીઓ પણ મેજિકને લગતા સર્ટિફિકેટ કોર્સ અને બીજા નાના નાના કોર્સ ચલાવે છે. તેમાં યુનિવર્સિટી ઓફ એમ્સ્ટર્ડમ અને રાઈસ યુનિવર્સિટીનો સમાવેશ થાય છે. આ સંસ્થાઓ પણ રહસ્યવાદ, જાદુવિદ્યા વગેરેના કોર્સ કરાવે છે. પશ્ચિમના સાહિત્યમાં ડ્રેગન ક્યાંથી આવ્યા તે વિષયથી લઈને કિંગ આર્થર વિશેની વાર્તાઓ, ઈસ્લામિક થોટ્સ, આર્કિયોલોજિકલ થિયરી વગેરે આ યુનિવર્સિટીઓમાં ભણાવવામાં આવે છે. તેમાં સ્ટુડન્ટના ક્રિયેટિવ થિંકિંગ અને તેમની જિજ્ઞાસા વધારવા પર ભાર મુકવામાં આવે છે.
