Congress president : કોંગ્રેસ અધ્યક્ષ મલ્લિકાર્જુન ખડગેએ ખેડૂતોને કહ્યું છે કે જો કેન્દ્રમાં કોંગ્રેસની સરકાર બનશે તો ખેડૂતોના હિતમાં જરૂરી નિર્ણયો લેવામાં આવશે અને પાક વીમાની રકમ સીધી ખેડૂતોના ખાતામાં મોકલવામાં આવશે. ખડગેએ કહ્યું, ‘ખેડૂતોને વીમાની ચૂકવણીની સીધી ટ્રાન્સફર થશે. કોંગ્રેસ બાંહેધરી આપે છે કે પાક વીમો ખેતર અને ખેડૂતને અનુરૂપ હશે, ‘ખેડૂત પાસેથી વીમાની રકમ મુજબ પ્રીમિયમ વસૂલવામાં આવશે અને ખેડૂતોના તમામ દાવાઓ 30 દિવસમાં પતાવટ કરવામાં આવશે.
તેમણે કહ્યું કે મોદી સરકારે પાક વીમા યોજનાને ખાનગી વીમા કંપનીની નફાની યોજના બનાવી અને 2016થી અત્યાર સુધીમાં મુઠ્ઠીભર વીમા કંપનીઓએ રૂ. 57,619.32 કરોડનો નફો કર્યો છે. ખેડૂતોના દાવાઓ સમયસર ન ચૂકવવા બદલ સરકારની ટીકા કરતા તેમણે કહ્યું, ‘સરકારી ડેટા મુજબ, ઉદાહરણ તરીકે, રવી 2022-23 દરમિયાન, લગભગ 6 કરોડ નોંધાયેલા ખેડૂતોમાંથી, માત્ર 7.8 લાખ ખેડૂતોના દાવા ચૂકવવામાં આવ્યા હતા. જે શરમજનક છે. કોંગ્રેસ પાર્ટી અન્નદાતા ખેડૂતોની સુખાકારી માટે સમર્પિત છે ‘અમે ખેડૂતોને ન્યાયની ખાતરી આપીને તેમનું જીવન સુધારીશું.’
