Stock market : ભારતીય શેરબજારમાં લાંબા સમયથી ચાલી રહેલી ઐતિહાસિક તેજી હજુ પણ યથાવત છે. આ ઐતિહાસિક તેજીમાં સ્થાનિક શેરબજાર સતત નવી ઊંચાઈ હાંસલ કરી રહ્યું છે અને નવા રેકોર્ડ બનાવી રહ્યું છે. નવા નાણાકીય વર્ષમાં નવી ઓલ ટાઈમ હાઈ હાંસલ કર્યા બાદ સોમવારે સ્થાનિક બજારના નામે નવો ઈતિહાસ નોંધાયો છે. BSE લિસ્ટેડ કંપનીઓનું માર્કેટ કેપિટલાઇઝેશન સોમવારે સવારે રૂ. 401.10 લાખ કરોડની સર્વકાલીન ટોચે પહોંચી ગયું હતું. આ પ્રથમ વખત છે જ્યારે BSE-લિસ્ટેડ કંપનીઓનું માર્કેટ કેપિટલાઇઝેશન રૂ. 400 લાખ કરોડને વટાવી ગયું છે. બીએસઈનો 30 શેરનો ઈન્ડેક્સ સેન્સેક્સ પણ તેની સર્વકાલીન ઊંચાઈએ પહોંચ્યો હતો.
સેન્સેક્સ શરૂઆતના કારોબારમાં 425.62 પોઈન્ટ ઉછળીને 74,673.84ની વિક્રમી ટોચે પહોંચ્યો હતો. બજારમાં આવેલી તેજીને કારણે, BSE-લિસ્ટેડ કંપનીઓનું માર્કેટ કેપિટલાઇઝેશન (mcap) રૂ. 4,01,16,018.89 કરોડની સર્વકાલીન ઊંચી સપાટીએ પહોંચી ગયું છે. ગયા વર્ષે જુલાઈમાં BSE-લિસ્ટેડ કંપનીઓનું માર્કેટ કેપિટલાઇઝેશન રૂ. 300 લાખ કરોડના સ્તરે પહોંચી ગયું હતું.
ગ્લોબલ ઓઈલ બેન્ચમાર્ક બ્રેન્ટ ક્રૂડ ફ્યુચર 1.36 ટકા ઘટીને US$89.93 પ્રતિ બેરલ પર ટ્રેડ થઈ રહ્યો હતો. શેરબજારના ડેટા અનુસાર, શુક્રવારે વિદેશી સંસ્થાકીય રોકાણકારો (FIIs)એ રૂ. 1,659.27 કરોડના શેરની ખરીદી કરી હતી.