IPO
ફૂડ ડિલિવરી કંપની સ્વિગીનો IPO 6 નવેમ્બરે આવવાની ધારણા છે. ખાસ વાત એ છે કે કંપનીએ પોતાના IPOની કિંમતમાં ઘટાડો કર્યો છે. અગાઉ કંપની 15 હજાર કરોડ રૂપિયાનો IPO લઈને આવવા જઈ રહી હતી. જે ઘટાડીને 11,300 કરોડ રૂપિયા કરવામાં આવી છે. જાણકારી અનુસાર કંપનીનું વેલ્યુએશન 11.2 બિલિયન ડોલર હશે. કંપની સાથે પરિચિત વ્યક્તિને ટાંકીને, મિન્ટે માહિતી આપી છે કે સ્વિગી IPO ઇશ્યૂ 6 નવેમ્બર, 2024 પછી સબસ્ક્રિપ્શન માટે ખુલશે. એન્કર બુકિંગ માટે 30 થી વધુ વિદેશી રોકાણકારો આગળ આવી શકે છે. સ્વિગી તરફથી હજુ સુધી કોઈ નિવેદન બહાર આવ્યું નથી.
11,300 કરોડનો આ IPO ચાલુ વર્ષમાં કોઈપણ ભારતીય કંપની દ્વારા લોન્ચ કરવામાં આવેલો સૌથી મોટો IPO હશે. થોડા દિવસો પહેલા હ્યુન્ડાઈ ઈન્ડિયા 27 હજાર કરોડ રૂપિયાનો આઈપીઓ લઈને આવી હતી, પરંતુ તે મૂળભૂત રીતે કોરિયન કંપની છે. આ IPOમાં રૂ. 4,500 કરોડની નવી ઇક્વિટી અને રૂ. 6,800 કરોડની OFS સામેલ હશે. બ્લેકરોક, CPPIB, સ્ટેટ બેંક ઓફ ઈન્ડિયા મ્યુચ્યુઅલ ફંડ જેવા વિદેશી અને સ્થાનિક રોકાણકારોએ આ જાહેર ઈશ્યુમાં ભાગ લીધો છે, જે એપ્રિલમાં પ્રથમ વખત મૂડી બજાર નિયમનકાર સેબીમાં દાખલ કરવામાં આવ્યો હતો. UDRHP મુજબ, IPOના બુક-રનિંગ લીડ મેનેજર્સ (BRLMs)માં કોટક મહિન્દ્રા કેપિટલ કંપની, સિટીગ્રુપ ગ્લોબલ માર્કેટ્સ ઈન્ડિયા પ્રાઈવેટ લિમિટેડ, જેફરીઝ ઈન્ડિયા પ્રાઈવેટ લિમિટેડ અને એવેન્ડસ કેપિટલ પ્રાઈવેટ લિમિટેડનો સમાવેશ થાય છે. લિન્ક ઈન્ટાઇમ ઈન્ડિયા પ્રાઈવેટ લિમિટેડ ઈસ્યુના રજિસ્ટ્રાર તરીકે કામ કરશે.
હાલમાં સ્વિગીના IPOની સરખામણી Zomato સાથે કરવામાં આવી રહી છે. શેરબજારમાં Zomatoનું વેલ્યુએશન 2.24 લાખ કરોડ રૂપિયા છે. જે સ્વિગીના અંદાજિત મૂલ્ય કરતાં લગભગ બમણું છે. BSE ડેટા અનુસાર, કંપનીનો શેર રૂ. 253.85 છે. Zomato 23 જુલાઈ 2021ના રોજ શેરબજારમાં લિસ્ટ થયું હતું. કંપનીની ઇશ્યૂ કિંમત 76 રૂપિયા હતી. આનો અર્થ એ થયો કે ઝોમેટોના શેરે રોકાણકારોને ઈશ્યૂ કિંમતથી 234 ટકા વળતર આપ્યું છે. હવે સ્વિગી સમક્ષ સૌથી મોટો પડકાર એ હશે કે રોકાણકારોને સમાન મલ્ટિબેગર વળતર કેવી રીતે આપવામાં આવશે.
