Govt windfall tax on crude : સરકારે ક્રૂડ પેટ્રોલિયમ પર વિન્ડફોલ ટેક્સ વધારવાનો નિર્ણય કર્યો છે. સરકારે સોમવારે મોડી સાંજે આ માહિતી આપી. કેન્દ્ર સરકારે એક નોટિફિકેશનમાં કહ્યું કે ક્રૂડ પેટ્રોલિયમ પર વિન્ડફોલ ટેક્સ 3,250 રૂપિયાથી વધારીને 6,000 રૂપિયા પ્રતિ ટન કરવામાં આવ્યો છે. આ નવા દરો 2 જુલાઈ, 2024થી લાગુ થશે. ડીઝલ-પેટ્રોલ અને ATFની નિકાસ પર વિશેષ વધારાની આબકારી જકાત (SAED) શૂન્ય પર ચાલુ રહેશે.
બીજી તરફ, સરકારે ડીઝલ, પેટ્રોલ અને એટીએફની નિકાસ પર સ્પેશિયલ એડિશનલ એક્સાઇઝ ડ્યુટી (SAED) શૂન્ય પર જાળવી રાખી છે. આનો અર્થ એ થયો કે ડીઝલ, પેટ્રોલ અને એટીએફની નિકાસ માટે હાલમાં ઉપલબ્ધ મુક્તિ ભવિષ્યમાં પણ ચાલુ રહેશે.
અગાઉ 15 જૂનના રોજ સરકારે સ્થાનિક રીતે ઉત્પાદિત ક્રૂડ ઓઈલ પરનો વિન્ડફોલ ટેક્સ રૂ. 5,200થી ઘટાડીને રૂ. 3,250 પ્રતિ ટન કર્યો હતો. આ ટેક્સ વિશેષ વધારાની આબકારી જકાતના રૂપમાં લાદવામાં આવ્યો છે.
જુલાઈ 2022 માં ભારતે પ્રથમ વખત વિન્ડફોલ ટેક્સ લાદ્યો
કેન્દ્રએ 1 જુલાઈ, 2022 ના રોજ પેટ્રોલિયમ ઉત્પાદનો પર વિન્ડફોલ ટેક્સ લાદવાની જાહેરાત કરી હતી. વિન્ડફોલ ટેક્સ દર 2 અઠવાડિયે સુધારવામાં આવે છે.
વિન્ડફોલ ટેક્સ એવી કંપનીઓ અથવા ઉદ્યોગો પર લાદવામાં આવે છે જે ચોક્કસ સંજોગોમાં નોંધપાત્ર તાત્કાલિક લાભ મેળવે છે. ભારતીય ઓઈલ કંપનીઓ તેનું સારું ઉદાહરણ છે. યુક્રેન પર રશિયાના હુમલા બાદ આંતરરાષ્ટ્રીય ક્રૂડ ઓઈલના ભાવમાં વધારો થયો છે. આનાથી ઓઈલ કંપનીઓને ઘણો ફાયદો થયો. રશિયા-યુક્રેન યુદ્ધને કારણે તેલ કંપનીઓ ભારે નફો કમાઈ રહી હતી, તેથી તેમના પર વિન્ડફોલ ટેક્સ લાદવામાં આવ્યો.
