Wipro
દેશની અગ્રણી આઈટી કંપની વિપ્રો તેના શેરધારકોને 1:1ના રેશિયોમાં બોનસ શેર આપવા જઈ રહી છે. કંપનીએ 21 નવેમ્બર, ગુરુવારે એક્સચેન્જ ફાઇલિંગમાં રેકોર્ડ ડેટ સંબંધિત મહત્વપૂર્ણ માહિતી શેર કરી હતી. વિપ્રોએ જણાવ્યું હતું કે કંપનીના બોર્ડ ઓફ ડિરેક્ટર્સે મંગળવાર, 3 ડિસેમ્બરે બોનસ શેર માટે રેકોર્ડ ડેટ નક્કી કરી છે. આનો અર્થ એ છે કે, વિપ્રોના શેર 3 ડિસેમ્બરે એક્સ-બોનસ ટ્રેડ કરશે. 3 ડિસેમ્બરે કંપનીના શેર ખરીદનારા રોકાણકારોને બોનસ શેરનો લાભ મળી શકશે નહીં. બોનસ શેરનો લાભ લેવા માટે રોકાણકારો પાસે 2 ડિસેમ્બર સુધીનો સમય છે. કંપની સોમવાર, 2 ડિસેમ્બર સુધી ખરીદેલા દરેક શેર પર બોનસ શેર આપશે.
વિપ્રોએ નાણાકીય વર્ષ 2024-25ના બીજા ક્વાર્ટરના નાણાકીય પરિણામો જાહેર કરવાની સાથે 17 ઓક્ટોબરે બોનસ શેરની જાહેરાત કરી હતી. વિપ્રોના બોર્ડ ઓફ ડિરેક્ટર્સે 2 રૂપિયાની ફેસ વેલ્યુ સાથે પ્રત્યેક શેર માટે 1 બોનસ શેર ઇશ્યૂ કરવાની ભલામણ કરી છે, એમ કંપનીએ 17 ઓક્ટોબરે એક્સચેન્જ ફાઇલિંગમાં જણાવ્યું હતું. કંપનીએ કહ્યું હતું કે બોનસ શેરની રેકોર્ડ ડેટ પછીથી જાહેર કરવામાં આવશે. જે બાદ આજે કંપનીએ બોનસ શેરની રેકોર્ડ ડેટ પણ જાહેર કરી છે.
તમને જણાવી દઈએ કે ગુરુવારે વિપ્રોના શેર રૂ. 4.45 (0.79%)ના ઘટાડા સાથે રૂ. 557.20 પર બંધ થયા હતા. કંપનીનો શેર આજે રૂ. 560.05ના ઘટાડા સાથે ખૂલ્યો હતો અને ટ્રેડિંગ દરમિયાન તે રૂ. 555.30ના ઇન્ટ્રાડે લો અને રૂ. 567.45ની ઇન્ટ્રાડે હાઇએ પહોંચ્યો હતો. શેરબજારમાં સતત ઘટાડા છતાં કંપનીના શેર 52 સપ્તાહના ઉચ્ચ સ્તરની નજીક છે. કંપનીના શેરની 52 સપ્તાહની ઊંચી સપાટી રૂ. 583.00 અને 52 સપ્તાહની નીચી રૂ. 393.20 છે. BSE ડેટા અનુસાર, વિપ્રોની વર્તમાન માર્કેટ કેપ રૂ. 2,91,513.36 કરોડ છે.
