Foreign Minister : ઈરાનના વિદેશ મંત્રી હોસૈન અમીર-અબ્દુલ્લાહિયાનું કહેવું છે કે દેશ આ ક્ષેત્રમાં તણાવ વધારવા માંગતો નથી. ઈરાનના વિદેશ મંત્રાલય તરફથી જારી કરાયેલા નિવેદન અનુસાર ઈરાનના વિદેશ મંત્રીએ મંગળવારે ઈન્ડોનેશિયાના વિદેશ મંત્રી રેત્નો મારસુદી સાથે ફોન પર વાતચીત દરમિયાન આ નિવેદન આપ્યું હતું. આ દરમિયાન, બંને પક્ષોએ ઇઝરાયેલ પર ઈરાનના મોટાપાયે જવાબી હુમલાઓ અને ગાઝા પટ્ટીની સ્થિતિ તેમજ દ્વિપક્ષીય સંબંધો સહિત મધ્ય પૂર્વમાં તાજેતરની ઘટનાઓ પર ચર્ચા કરી.
સિન્હુઆ ન્યૂઝ એજન્સીના અહેવાલ મુજબ, વિદેશ પ્રધાન અમીર-અબ્દુલ્લાહિયાને કહ્યું કે ઈરાન હંમેશા આ ક્ષેત્રમાં સ્થિરતા અને સુરક્ષાનો મહત્વપૂર્ણ ભાગ બની રહેશે. આ ક્ષેત્રમાં તણાવ અને યુદ્ધનું મૂળ કારણ ઈઝરાયેલ છે. વિદેશ મંત્રીએ 1 એપ્રિલે સીરિયાની રાજધાની દમાસ્કસમાં ઈરાનના દૂતાવાસના કોન્સ્યુલર વિભાગ પર ઈઝરાયેલના કથિત હુમલાની ઈન્ડોનેશિયાની નિંદાની પ્રશંસા કરી અને ઈઝરાયેલના હુમલાને આક્રમકતાનું કૃત્ય ગણાવ્યું.
