અમેરિકામાં બધું સેટ થાય તે સાથે જ ભારતીયો ત્યાં પ્રોપર્ટી તેમજ જમીનોમાં રોકાણ કરવાનું શરૂ કરી દે છે, તેમાંય હાલના દિવસોમાં ઈન્ડિયામાં જમીનના ભાવો આસમાનને આંબી રહ્યા હોવાથી લોકો ભારતમાં રૂપિયા રોકવા કરતાં અમેરિકામાં સસ્તામાં મળતી જમીન ખરીદવામાં વધારે રસ લઈ રહ્યા છે. જે રીતે અમેરિકામાં ગુજરાતીઓની મોટી વસ્તી છે તેવી જ રીતે અમેરિકામાં તેલુગુભાષી લોકો પણ ખૂબ મોટી સંખ્યામાં વસે છે.
અમારા સાથી અખબાર ટાઈમ્સ ઓફ ઈન્ડિયાના એક અહેવાલ અનુસાર, હાલના દિવસોમાં હૈદરાબાદ જેવા શહેરની આસપાસ ૧ એકર જમીનના ભાવ ૪૦-૫૦ કરોડ રૂપિયાની આસપાસ પહોંચી ગયા છે, ત્યારે અમેરિકામાં વસતા તેલુગુભાષી લોકો હૈદરાબાદથી દસ ગણી ઓછી કિંમતમાં અમેરિકામાં મોટાપાયે જમીન ખરીદી રહ્યા છે, ખાસ કરીને ટેક્સાસમાં આવેલા ડલાસ અને ઓસ્ટિનમાં જમીનો ખરીદવામાં આવી રહી છે, જ્યા એક એકરનો ભાવ પાંચથી સાત લાખ ડોલર મતલબ કે ૪થી ૬ કરોડ રૂપિયાની આસપાસ ચાલે છે. અમેરિકામાં વસતા ભારતીય બિઝનેસમેનથી લઈને કોર્પોરેટ એક્ઝિક્યુટિવ્સ, ડોક્ટરો, વકીલો અને વેપારીઓ ટેક્સાસમાં જમીનો ખરીદી રહ્યા છે, નવાઈની વાત એ છે કે જે લોકો ટેક્સાસમાં નથી રહેતા તે લોકો પણ અહીં જમીન ખરીદવામાં રસ બતાવી રહ્યા છે.
અમેરિકાના ઈન્ડિયાના સ્ટેટમાં કાર્ડિયોલોજિસ્ટ તરીકે પ્રેક્ટિસ કરતાં અને હાલમા જ ઓસ્ટિનમાં જમીન ખરીદનારા એક ભારતીય ડોક્ટરના જણાવ્યા અનુસાર ઈન્ડિયામાં જમીન ખરીદીને તેને સાચવવી ખૂબ જ અઘરી છે, તેવામાં છેક ઈન્ડિયા લાંબા થવાને બદલે તેનાથી સસ્તા ભાવે અમેરિકામાં જમીનમાં રોકાણ કરવું વધુ બહેતર છે. ટેક્સાસથી સેંકડો માઈલ દૂર રહેતા ઈન્ડિયન્સ પણ આ રાજ્યમાં જમીન ખરીદવામાં ખાસ રસ લઈ રહ્યા છે. ટેક્સાસમાં હવામાન પણ ભારતીયોને માફક આવે તેવું છે, અને અહીંયા જમીન કેલિફોર્નિયા જેવા રાજ્યની સરખામણીમાં લગભગ ૫૦ ટકા સસ્તી છે, ડલાસ જેવા શહેરની જ વાત કરીએ તો અહીં વર્ક અને લાઈફનું બેલેન્સ કરવું પ્રમાણમાં સરળ છે, અને ડલાસથી અમેરિકાના કોઈપણ ભાગ તેમજ ઈન્ડિયા જવા માટે સરળતાથી ફ્લાઈટ પણ મળી રહે છે. આટલું ઓછું હોય તેમ ડલાસ અને તેની આસપાસ ઘણી મોટી કંપનીઓ ઓપરેટ કરે છે.
ટેસ્લાએ હાલમાં જ પોતાની ઓફિસ ઓસ્ટિનમાં શિફ્ટ કરી છે, જ્યારે ટોયોટાનું હેડક્વાર્ટર્સ નોર્થ ટેક્સાસમાં આવેલું છે. ટેક્સાસ ઈન્સ્ટ્રૂમેન્ટ્સ, સેમસંગ, ડેલ અને બીજી મોટી કંપનીઓ પણ અહીં આવેલી હોવાથી રોજગારીની તકો પણ વિશાળ પ્રમાણમાં ઉપલબ્ધ છે. ટેક્સાસમાં ગુજરાતીઓની પણ સારી એવી વસ્તી છે, અહીં મોટાભાગની મોટેલ્સ તેમજ ઈન્ડિયન સ્ટોર્સની માલિકી ગુજરાતીઓ પાસે છે. તો બીજી તરફ, ટેક્સાસમાં કન્સલ્ટન્સી અને રિક્રુટમેન્ટ કંપનીઓમાંની લગભગ ૯૦ ટકા તેલુગુ લોકોની માલિકીની છે. આ કંપનીઓએ છેલ્લા કેટલાક સમયમાં સારો એવો નફો કર્યો છે, અને તેના કારણે જ તેમના દ્વારા અહીં મોટાપાયે જમીનની ખરીદી પણ થઈ રહી છે. સૂત્રોનું માનીએ તો, ડલાસથી ૩૦ મિનિટના અંતરે આવેલા ફ્રિસ્કોમાં ઘરોની ડિમાન્ડ વધી રહી છે, જ્યારે ફ્રિસ્કોની ઉત્તરે આવેલા પ્રોસ્પર અને સેલિનામાં ઈન્ડિયન્સ મોટાપાયે જમીન ખરીદી રહ્યા છે. એક તરફ, ભારતીયોને કારણે ટેક્સાસમાં જમીન-મકાનના ભાવમાં તેજી જાેવા મળી રહી છે, તો બીજી તરફ આ તકનો લાભ ઉઠાવવા કેટલાક ગઠિયા પણ સક્રિય બન્યા છે. ડલાસ અને ઓસ્ટિનમાં સસ્તામાં પ્લોટ અપાવવાના નામે લોકો સાથે છેતરપિંડી કરવામાં આવે છે, અને તેમાંય અહીં રોકાણ કરવા માગતા ઘણા લોકો બીજા સ્ટેટ્સમાં રહેતા હોવાના કારણે લેભાગુ તત્વો તેમને સારી ડીલ કરાવી આપવાની લાલચ આપીને તેમની સાથે ઠગાઈ કરે છે.
